HOW VALENTINE DEY AFFECT OUR ECONOMY by Jedidiah Ikoba

Valentine na for lovers. Na for everywhere for d world o but naija we carry valentine 4 head well o.Secondary school students o,even primary school dis days don dey get val.As for university nor go there o. Dem dey finish work for this valentine tory. Na girls dey enjoy dat day pass ni. Na so we guys o, aristos or maga(the bigger d pot belle d more d money) go dey buy fine gifts 4 their girl friends, d kind one wey dem neva buy give their malle or wife once sef. Oyinbo pipo own u fit jus buy one flower or card for your chick but 4 naija,try am first! D babe go tear d card 4 your present or stone u wit your yeye flower. She go ask u if dem dey chop am? So na rule o. U must buy expensive gift for your babe and una must to go out o. So tay sum guys for uni those days wey dey do 0-1-0 eatin formula go buy beta shoe or phone 4 their chikito come carry her go fastfood wen him neva enta at all before. Some go even use their skool fees do am o.
Evn married couples join for the matter o.Afteralls dem be lovers too! Na so expensive gifts go dey flow. But my broda wetin dey pain me be say after guys don buy expensive gifts giv these girls na cheap tins like boxers, singlet,cheap watch naim dem go buy giv d guys. Dat na wayo na, correct akpaco d babes dem be.
Now how dis one take affect our economy sef. My broda me I nor see o. E nor dey affect our economy one kobo! Forget say guys dem dey buy expensive gifts and go outings wit the babes dat day. Instead na oyinbo economy we dey develop. Almost all d gifts wen we dey buy dat day na obodo oyibo dem dey import dem come,even up to card sef becos na only to consume we sabi. So in the end our economy siddon for d same bottom wey e dey. Instead sef we dey lose money & our economy dey die go.
Sum guys dey go thief or do yahoo or thief from gofment(those wey be politicians and workers) so dat dem go fit meet up,so corruption dey increase. Girls sef dey get belle anyhow,HIV dey spread. All dis tins too dey kill our economy bcos the youth na dem be the ogbonge pilotay for d economy steerin and 419 wit him bros corruption dey kpai our economy. Fear nor go let oyinbo come here bcos dem go open oFfice for him head.
Last last,love na evryday tin no be only jus for valentine day. If you love the boo or sisi, dey show the love everyday nor be only for valentine. Shikina!